سەرۆك بارزانی: ئێكەتییا ئافرەتان دەستكەڤتەكێ گرنگێ خەباتا نەتەوەیی و بزاڤا ڕزگاریخوازا كوردستانێ یە
سەرۆك مەسعود بارزانی پەیامەك ب هەلكەڤتا 73 سالییا دامەزراندنا ئێكەتییا ئافرەتێن كوردستانێ بەلاڤكر.
سەرۆك بارزانی د پەیاما خۆدا بۆ ئێكەتییا ئافرەتان دیاركر، ب هەلكەڤتا 73 سالییا دامەزراندنا ئێكەتییا ئافرەتێن كوردستانێ پیرۆزباهییێن گەرم ئاراستەی هەوە و هەموو ئەندامێن ڕێكخراوا هەوە یا تێكۆشەر و هەموو ئافرەتێن كوردستانێ دكەت.
ئاماژە ب هندێ دا، ئێكەتییا ئافرەتێن كوردستانێ دەستكەڤتەكێ گرنگێ خەباتا نەتەوەیی و بزاڤا ڕزگاریخوازا كوردستانێ یە، ڕۆلەكێ بەرچاڤ و كاریگەر د بلندكرنا ئاستێ هشیارییێدا، پاراستنا مافێن ئافرەتان و ب هێزكرنا پێگەهێ ئافرەتا كورد دا هەبوو، هەروەسا ئاشكرا كر، ئەڤێ ڕێكخراوێ ب تێكۆشەرییا خۆ یا بەردەوام شیا دەنگێ ئافرەتێن كوردستانێ بگەهینیت و پشكەكا گرنگ بیت د خەباتا نەتەوەیی و مەدەنییا گەلێ كوردستانێ دا.
سەرۆك بارزانی ل دووماهییا پەیاما خۆ دووپاتكر، دڤێ هەلكەڤتێدا، ئەوی پێزانین بۆ خەبات و قۆربانیدانا ئافرەتێن كوردستانێ و ئەو ئەركێ كو د قووناغا خەباتا گەلێ كوردستانێدا ل سەر ملێن وان هەنە، یێ پشت راستە ئێكەتییا ئافرەتێن كوردستانێ وەكو قووناغێن پێشتر یێن خەباتا خۆ، دێ ل پاشەرۆژێ د پێشڤەبرنا دۆزا ڕەوا یا گەلێ كورد و بەرەڤانیكرن ژ ماف و داخوازییێن ئافرەتان، ڕۆلێ پیشەنگ گێریت.
