ژێدەرەکێ ژ وەزارەتا دارایی راگەهاند، سوبەهی رێکارێن تەمویلکرنا مووچەیێ مەها ئۆکتۆبەرێ (تشرینا ئێکێ) یێ مووچەخۆرێن هەرێما کوردستانێ دێ دەستپێکەن. ئاماژە ب وێ چەندێ ژی کر: “ب ئەگەرەکێ مەزن تەمویلکرنا پارەی دێ کەڤیتە رۆژا پێنجشەمبی.”
رۆژا سێشەمبی، 23ـی کانوونا ئێکێ یا 2025ێ، ژێدەرەکێ ژ وەزارەتا دارایی یا هەرێما کوردستانێ راگەهاند، “ئەڤرۆ محەمەد شیاع سوودانی، سەرۆکوەزیرێن عێراقێ، رەزامەندی ل سەر خەرجکرنا مووچەیێ مەها 10 یێ مووچەخۆرێن هەرێما کوردستانێ دا؛ ئەو رەزامەندییە دێ بیتە نڤیسارەک بۆ وەزارەتا دارایی یا عێراقێ و تەیف سامی دێ ئیمزا کەت. ئەڤرۆ دەست ب بەرهەڤکرنا نڤیسارێ هاتییە کرن و سوبەهی دێ بۆ وەزارەتا دارایی هێتە هنارتن و ل وێرێ ژی رێکار دێ هێنە ب دووماهی ئینان.”
ب گۆتنا وی ژێدەرێ رووداو، ئەگەر سوبەهی رێکار ب دووماهی بهێن، پارە دێ هێتە هنارتن، “بەلێ ب ئەگەرەکێ مەزن سوبەهی رێکار ب دووماهی ناهێن و تەمویلکرنا پارەی دێ کەڤیتە رۆژا پێنجشەمبی.”
دەربارەی لیستا مووچەی ژی، ژێدەرێ رووداو گۆت، “وێ رۆژا پارە دهێتە تەمویلکرن، ئەم دێ لیستا مووچەی راگەهینین. ئەگەر رۆژا پێنجشەمبی پارە بهێتە هنارتن، بەلاڤکرنا مووچەی دێ کەڤیتە دەستپێکا حەفتیا بهێت و د ماوێ 3 رۆژان دا مووچە دێ هێتە بەلاڤکرن.”
