ناڤەندا نووچەیان
فەرماندەیا گشتی یا هێزێن سووریا دیموکرات دوپات دکەت کو پتر ژ شەش مەهانە گەڕەکێن شێخ مەقسوود و ئەشرەفیە ب تەمامی ژ لایێ هێزێن حکومەتا دیمەشقێ ڤە هاتینە گەمارۆدان. ئەڤ گەڕەکە ب چو ڕەنگەکی مەترسیا سەربازی دروست ناکەن و ناهێنە بکارئینان وەک خالەک بۆ دەسپێکرنا چو هێرشان بۆ سەر باژارێ حەلەبێ. ئەو ئیدیعایێن کو ژ لایێ هندەک لایەنێن د ناڤ حکومەتا دیمەشقێ دا دهێنە بەلاڤکرن دەربارەی هەبوونا نیاز یان کارەکێ سەربازی یێ هێزێن مە ل ڤان هەردو گەڕەکان، هەمی درەو و چێکری نە؛ بتنێ وەک بەهانە دهێنە بکارئینان بۆ ڕەوادان ب وێ گەمارۆدان، بۆردومان و کۆمەڵکوژیێن دژی خەلکێ سڤیل دهێنە ئەنجامدان.
ئەم ب توندی دیار دکەین کو هێزێن سووریا دیموکرات چو هەبوونا سەربازی ل باژارێ حەلەبێ نینە. ڤەکێشانا وان ب ئاشکرایی و ل پێش چاڤێن میدیاکان بوو، و ب گۆرەی ڕێککەفتنەکا ڕوون مەلەفێ ئەمنی ڕادەستی هێزێن ئاسایشا ناڤخۆ هاتبوو کرن. زێدەکرنا ڤان گۆتگۆتکێن درەو بتنێ ئارمانج ژێ ئەوە کو پەردەیەکا سیاسی و سەربازی بدەنە وان هێرشێن دڕندانە یێن کو بەردەوامن بۆ سەر گەڕەکێن ئاڤەدان و ئارام.
داوا ژ دەولەتێن گەرەنتیكار و بەرپرسێن ناڤ حکومەتا سووریێ دکەین، ئەوێن کو دبێژن ئەم یەکگرتوویا نەتەوەیی دپارێزین، کو بەرپرسیاریا خۆ هەلگرن و کار بکەن بۆ ڕاوەستاندنا وێ گەمارۆدان و بۆردومان و هێرشێن سەربازی یێن کو خەلکێ بێ گونهە ل شێخ مەقسوود و ئەشرەفیە دکەنە ئامانج.
ئەم هۆشداریێ ددەین کو بەردەوامیا ڤێ دەستدرێژیێ بۆ سەر خەلکێ سڤیل دێ ئەنجامێن گەلەک دژوار هەبن، و دێ کاریگەری ل سەر هەمی سووریێ هەبیت و وڵاتی بەرەو شەڕەکێ مەزن و ڤەکری بەت، نەک بتنێ ل حەلەبێ. بەرپرسیاریا ڤێ یەکێ ژی دکەڤیتە ستۆری وان کەسان یێن کو هێزێ دژی خەلکێ سڤیل بکار دئینن.
فەرماندەیا گشتی یا هێزێن سووریا دیموکرات ب هوشیاری ڤە چاڤدێریا بارودۆخی دکەت، ب هەماهنگی دگەل هەمی لایەنێن پەیوەندیدار بۆ پاراستنا گیانێ خەلکێ مە ل گەڕەکێن شێخ مەقسوود و ئەشرەفیە. دوپات دکەین کو گەمارۆدان، گەفێن بکارئینانا هێزێ و بکارئینانا سڤیلان وەک فشار، تاوانەکا مەزنە و ب چو پیوەرێن یاسایی و مرۆڤایەتی ناهێتە قەبوولکرن.