ب ناڤێ خودایێ مەزن و دلۆڤان
گۆڕانکارییێن سیاسی یێن ل سووریا دەرفەتەکا باش بوون بۆ دۆزینەڤەیا ڕێچارەیەکا گونجای دا کو ڕەچاوا مافێن ڕەوا یێن گەلێ کورد ل سووریا بهێتە کرن و هەمی کێشە ژی بهێنە چارەسەرکرن. ژ پێخەمەت ڤێ یەکێ ژی، مە دگەل هەمی لایەنان هەوڵێن زۆر دان کو دڤێت هەرچی ئاریشە و ناکۆکی هەبن ب ڕێکا دیالۆگێ و ب شێوازەکێ ئاشتیانە بهێنە چارەسەرکرن.
بەلێ ئەڤ بارودۆخێ مەترسیدار و ئەو شەڕ و توندوتیژیا کو نوکە ل باژارێ حەلەبێ هەی، جهێ نیگەرانیەکا زۆرە و مەترسی ل سەر ژیانا خەلکێ سڤیل و وەلاتیێن بێ گونهە دروست کریە، و هەڕەشا پاقژکرنا ڕەگەزی (تەطهیر عرقی) دژی کوردان ل وێ دەڤەرێ هەیە.
داوا ژ دەستهەلاتدارێن سووریا دکەم کو ناکۆکیا سیاسی نەکەنە ناکۆکیا نەتەوەیی، و ل وان ئاریشە و گرفتێن ل دەڤەرا حەلەبێ هەی، ڕێ نەیێتە دان وەلاتیێن کورد تووشی فشار و زەبروزەنگ و دەرئێخستنێ ژ جهـ و وارێن باب و باپیرێن خۆ ببن، یان ڕووبەڕووی پاقژکرنا ڕەگەزی ببنەڤە. هەروەسا داوا ژ لایەنێن کوردی و ب تایبەت (قەسەدە) دکەم، ئەوا د شیانێن وان دا هەبیت ئەنجام بدەن ژ پێخەمەت ڕاگرتنا شەڕ و پێکدادانان و ڕێگریگرتن ل خوینڕشتنا پتر، و هەردو لایەن کار بکەن بۆ گرتنەبەرا ڕێکا دیالۆگ و گۆتوبێژان بۆ چارەسەرکرنا کێشەکان. نابت هەبوونا ناکۆکیا سیاسی ببیتە ئەگەرێ هندێ کو ژیانا خەلکێ سڤیل بکەڤیتە د مەترسیێ دا و پاقژکرنا ڕەگەزی دژی گەلێ کورد ڕوو بدەت، چونکی ئەڤە تاوانە دژی مرۆڤایەتیێ و دێ ئەنجامێن مەترسیدار ل دویڤ خۆ ئینیت.
مەسعوود بارزانی
٧ی کانوونا دویێ ٢٠٢٦
